Во Собранието почна постапката за пристапување кон уставни измени, ставовите непроменети

11.10.2018 | 09:34
Прочитано: 993

Во Собранието почна претресот по предлогот за пристапување кон измена на Уставот. Првата седница на Комисијата за уставни прашања се одржа вчера. Позициите не се променија. И мнозинството и опозоцијата останаа на своите ставови. Едните дека е ова е неповторлива шанса, а другите процесот е неуставен. Продолжение е закажано за утре во 14 часот.

- Сега е време сите што се за НАТО и ЕУ да ги поддржат измените и заедно, исклучиво заедно да ја однесеме Македонија напред, порача  премиерот Зоран Заев на седницата на собраниската Комисија.

Тој изрази верба за можен успешен процес во Собранието за уставни измени и членство на Македонија во ЕУ и НАТО.

- Ако е и ВМРО-ДПМНЕ „за“ ајде да ги донесеме одлуките. Добивме држава признаена од сите. Имаме признанен идентитет, порача премиерот Заев.
Според него успешен референдум значи и мнозинство и консензус и дека во овој случај мора да се земе предвид изразената волја на излезените 600 илјади граѓани.
 
- Мораме да донесеме одлуки. Шансата е неповторлива. И Мицкоски и  Иванов знаат дека информирав за секој телефонски разговор во процесот на постигнувањето на договорот. Некој мораше да донесе одлука и го направив тоа. Преземете и вие одговорност и да ја обезбедиме државата,  рече премиерот.
 
Пратеnиците од мнозинството дадоа поддршка.
 
Пратеничката Соња Мираковска од НСДП истакна дека ќе ги поддржи уставните измени и ги повика своите колеги од опозициската ВМРО-ДПМНЕ да го сторат истото.
 
На храброст и заеднички да се донесе одлуката повика пратеникот од ДУИ Артан Груби.

- Ајде помогнете заеднички. Ние сме пред одлука која треба да ја гледаме како политичари или лидери. Дали ќе гласаме за следните генерации или за следните избори. Јас и моите истомисленици особено тие од ДУИ знаеме точно што им треба на следните генерации безбедна држава, рамо до рамо со Вашингтон и Брисел, рече Груби.
Порача дека денес и деновите пред нас се денови за храбрите пратениците.
 
- Стравот е изолација, а храброста е интеграција. Убеден сум дека ќе се убедиме самите себе си дека ова е единствениот пат за нашата Македонија, истакна Груби.
 
Во текот на дебата Трајко Вељаноски пратеник од ВМРО-ДПМНЕ и поранешен претседател на Собранието му порача на премиерот Заев дека нема двотретинско мнозинство за уставни измени и дека менувањето на Уставот е спротивно на мнозинската волја на народот.
 
За Илија Димовски од ВМРО-ДПМНЕ ова е важно прашање и дека треба да се постапи онака како што разумот и срцето зборува колку тоа и да е тешко.
 
- Веројатно ова е една од точките во животот кој што секој од нас присутен во оваа сала ќе ги памети и ќе ги раскажува на следните поколениија како се поставил во одредена ситуација, можеби и најбитната во животот како предизвик и оттука мораме да постапуваме онака како што разумот и срцето ни зборува колку и да е тешко, колку и да имаме лични судири во своите убедувања едноставно мораме да постапуваме така како што размислуваме, истакна Димовски.
 
Според него одлуката СДСМ сама да влезе во овој процес е одлука која што го погреба овој процес преку неколу елементи. - Одлуката да пристапи без учество на ниту еден претставник од опозицијата, да се потпише договорот пред да и се покаже на опозицијата и одлуката на СДСМ без ВМРО-ДПМНЕ да распише референдум, појасни Димов.
 
- Ваков стратешки договор без политичка поддршка од двете македонски идеолошки крила е невозможно да живее, потенцира Димовски.
 
Порача дека решението е заедништво, единство и консензус и враќање на состојбата со Резолуцијата едногласно утврдена во 2008 година.
 
Фадил Зендели од движењето Беса посочи дека двавата македонски блока треба да најдат решение во однос на ова прашање, истакнувајќи при тоа дека, ова не значи дека ова прашање не е значјано и за Албанците.
 
- Сите прашања се во интерес на сите граѓани и Република Македонија треба да се гради како модерна демократска земја, рече Зендели посочувајќи дека треба да се уреди прашања во Уставот кој се однесува на рамноправност на албанската етничка заедница во Македонија, употребата на јазикот и националните симболи.

Сурија Рушити од Алијанса на Албанците потенцира дека го поддржуваат процесот на интеграција во ЕУ и НАТО, но оти тоа треба да оди заедно со внатрешна кохезија во Република Македонија.

И тој како и Зендели, посочи на постигнување целосна рамноправност на Албанците и употребата на албанскиот јазик.

Поддршка да се гласа побара Костадин Костадинов од СДСМ, а Дафина Стојановска од ВМРО-ДПМНЕ побара откажување од договорот.

Во расправата се вклучи и министерот за надворешни работи Никола Димитров кој рече дека на референдумот ќе имаше чиста ситуација доколку имаше гласови „против“.

- Ќе го затворевме ова крупно поглавје. Бидејќи народот нема одлука, се враќа назад во Собранието. Но зошто треба да се оди напред оти народот, односно 609 илјади рекле „да“, рече Димитров.

По предлогот за пристапување кон измена на Уставот во Комисијата, согласно член 196 од Деловникот, може да трае најмногу десет работни дена. Член на Комисијата за уставни прашања и пратеник во текот на претресот може да говори повеќе пати во траење од вкупно 20 минути, а координатор на пратеничка група вкупно 30 минути. Претставникот на предлагачот во претресот може да говори повеќе пати, но не повеќе од 30 минути вкупно.
 


The content of this field is kept private and will not be shown publicly.
Image CAPTCHA
Enter the characters shown in the image.