Одбраната побара изземање на судии и за „Траекторија“

17.04.2018 | 13:31
Прочитано: 921

Одбраната на обвинетите во предметот на СЈО „Траекторија“ на денешното рочиште побара изземање на судечкиот совет, на претседателот на Кривичен суд Иван Џолев и на судии од Апелацискиот суд.

Адвокатот Еленко Миланов рече дека изземањето го бараат поради информации и изнесени од специјалната обвинителка Катица Јанева на една телевизија дека во снимените аудио материјали со кои располага СЈО има и судии и обвинители.

Ова е истата причина поради која беа барани изземања и во други случаи на СЈО.

Претседателот на судечкиот совет Горан Бошевски, кажа дека барањето за изземање на Џолев и на судии од Апелација е неосновани и затоа се отфрла. Барањето, пак, за изземање на членовите на судечкиот совет ќе биде доставено на одлучување до претседателот на Кривичен суд Иван Џолев.

За вакво барање претседателот на Судот треба да донесе одлука најдоцна за три дена.

Во „Траекторија“ обвинети се поранешниот премиер Никола Груевски, поранешниот вицепремиер Владимир Пешевски, екс-министерот за транспорт и врски Миле Јанакиески и поранешниот директор на Агенцијата за државни патишта, Љупчо Георгиевски. Тие денеска дојдоа во Кривичниот суд.


The content of this field is kept private and will not be shown publicly.
Image CAPTCHA
Enter the characters shown in the image.