Зариф: Трпиме најбрутална форма на економски тероризам
Foto

Зариф: Трпиме најбрутална форма на економски тероризам

Иранскиот министер за надворешни работи Мохамед Џавад Зариф повторно го критикуваше „економскиот тероризам“ на САД, кој воведе санкции на Техеран за, како што рече, „да се постигнат незаконски политички цели“.

– Нашите луѓе ја трпат најбруталната форма на економски тероризам, кој намерно е насочен против невините цивили, за да се постигнат незаконски политички цели, рече Зариф на конференцијата за одржлив развој што се одржа во Обединетите нации во Њујорк.

Тој додаде дека тие „незаконски санкции создадоа огромни пречки на Исламската република и претставуваат најголема закана за постигнување на целите за одржлив развој на Иран и многу негови соседи“.

САД се повлекоа од договорот за иранската нуклеарна програма минатата година и ги вратија санкциите против Иран, а Иран возврати со откажување од почитување на некои од ограничувањата во договорот. Тензиите меѓу двете земји ескалираа поради серијата инциденти во Персискиот залив.

Вашингтон неодамна се закани дека ќе воведе санкции и му издаде виза на Зариф со ограничувања за посетата во ОН. Според таа виза, Зариф може да се движи само во ограничениот простор околу седиштето на ОН во Њујорк, вклучувајќи ја и иранската мисија и резиденцијата на иранскиот амбасадор. Одлуката предизвика критики од страна на ОН. Зариф изјави дека мерката „сигурно не е пријателски гест“.

Иранскиот министер за надворешни работи денеска ќе има средба со генералниот секретар на ОН, Антонио Гутереш. Претставниците на трите земји – членки на ЕУ кои се дел од нуклеарниот договор, исто така, побараа средба со Зариф, но тој сè уште не одговори на барањето.

0 Коментари

Остави коментари