За време на протестите во САД уапсени околу 5.600 луѓе
Foto

За време на протестите во САД уапсени околу 5.600 луѓе

На протестите во САД за една недела се уапсени повеќе од 5.600 луѓе поради кражби, блокирање патишта и кршење на полицискиот час.

Протестите, кои почнаа поради насилната смрт на Афроамериканецот Џорџ Флојд од страна на полицаец, продолжија и покрај воведениот полициски час во 40 градови.

Припадници на Националната гарда се распоредени во 23 држави и во главниот град Вашингтон.

Во некои градови протестите беа мирни, но имаше и инциденти. Во Оукланд, Калифорнија, мирни демонстранти беа приведени и уапсени затоа што биле на улиците по почетокот на полицискиот час, јави Си-Ен-Ен.

Повеќето од протестите во Њујорк беа мирни маршеви, но во текот на ноќните часови имало сè повеќе случаи на уништување имот и грабежи.

Градоначалникот на Њујорк, Бил де Бласио потврди дека за време на протестот е уапсена и неговата ќерка Кјара (25).

Полицијата во Сиетл соопшти дека демонстрантите фрлале камења, шишиња и огномет кон полицијата.

Во пукање во Сент Луис се погодени четворица полицајци кои се надвор од животна опасност, јави Би-Би-Си.

0 Коментари

Остави коментари